Nostalgična i dirljiva priča zagorskog iseljenika u vrijeme Uskršnjih blagdana

Vuzem zajec




Od našeg čitatelja Franka Jankača iz Kanade, koji istražuje povijest hrvatske dijaspore, dobili smo ovaj tekst. Ova dirljiva priča govori o nostalgiji i osjećajima iseljenika prije otprilike sto godina za vrijeme Uskrsa. U nastavku pročitajte cijeli tekst:

“Ja sem več puno let v Ameriki i pri delu i kraj sakujačkih brig za familiju prejde mi više put i par mesecof, da se na stari kraj i na moje rodno selo ne zmislim. Ali kad dojdu kakovi svetki, kak je to božić ili Vuzem, onda se moji mustači nekak žalostno dol obesiju i grdo mi se vidi, kajti se baš na takove svetke najviše smislim na stari kraj i na se lepe narodne šege, kojih tu naši ludi več ne obdržavleju i svetki im prejdu skoro kak i saki drugi dan, pogotovo onda, kad se šape ronaju.

Već sem i ja bogme i na Božić i na Vuzem moral v šapi delati, kajti sem bil pri fanesu gde se ne pita, jeli se je naš dragi Jezušek narodil il je skrsnul z groba. Zato sem si ovoga Vuzma, kad se sigdi slabo dela, sedel doma i tužno zdihaval:



Bog moj dragi, kaj ova Amerika z poštenoga čoveka napravi! Kuliko je naši ludi ovdi, kaj nesu več leta i leta v cerkvi bili niti su na spoved išli. Dok smo doma v kraju saku nedelu lepo v čisto oblečeni išli k meši i po vuru daleko, vezda tu niti na božić cerkve niti z vana ne pogledamo. Istina, verek, neje v sakom mestu hrvacke cerkve, ali, vrag ga dal i stvoril, kuliko je ludi i znašega kraja, koji su vu mestu, gdje hrvacka cerkva jeje, pak ipak nikaj za nju ne maraju.

Kad se zmislim, kak smo mi bojsi v mojem selu v šume išli iskat drenovine, bršlana i druge zelenjave, s kojim smo nakinčali naše palme za procesiju, oče mi srce puknuti, kad se toga tu nega. A kaj je lepšega nek kad smo rano v jutro na Vuzem išli na brege kurit uzmice i jedni drugim z brega na breg juškali, pucali z pištolinof i pekli jajca s klobasami?

A kakvo je to veselje bilo, kad su mladi dečki i puce k velikoj meši i prošeciji išli na Vuzem? Dečki su nacukavali puce za pisanice, mlajši bojsi su se trgali pod zvonikom koj bu za prošeciju zvonil, a kad su došli stari školnik i otprli vrata na koruš, si smo se rivali najenput nuter samo da bi došli na prva mesta z kojih se je dobro vidlo se lude dole v cerkvi.



I onda smo zapopevali: Na Uskrsa dan toga, … zvoni su zazvonili, i prošecija je započela, mužari su pucali, a si ludi su bili srečni i popevali od srca, pozabili su na se siromaštvo, na pravde, sude, ekšekucije, globe i štibru…

Sako leto je bilo više naši bojsof, koji su došli na urlab doma iz soldačije i ti su se znali postavlat pred cerkvom na svetke, a to je nas druge bojse srdilo, kojti su puce samo na soldate gledale. Na Vuzmeni pondelek smo išli k meši na drugi breg gdje je bila kapela Majke Božje, a onda smo se ja i moj japek navek zastavili pri kumu v njegovoj kleti i tam smo malo jeli i pili i mnogiput smo došli stoprom po noći doma.

Još se dobro zmislim kak su kraj potoka vu selu i po pašnjaku posvud bile one bele rožice, kaj su je zvali visibaba, bilo je i plavih i žutih rožic kad je Vuzem bil kesnejše i kad je proleče već toplo bilo. Se je to bilo tam v starom kraju, ali tu ne vidim nikaj, ne čujem nikaj i mesto veselja, žalost mi v srce se bole i bole zahaja na takove dane.

Ako si ikaj, to si želim još jenput v starom kraju preživeti ovakove svetke i onda ne me slobodno zakopaju.

Pozdravla ih,

Štefek z mustači”

ODIGRAJTE NAŠ KVIZ O GRUNTOVČANIMA!